14 އެއްކުރަން 2 އެއީ ކިހާވަރެއްތޯ އަހައިފި ނަމަ އަޅުގަނޑުމެންގެ ތެރެއިން ގިނަ މީހުން މިއަދު ބޭއިޚްތިޔާރުގައި ނަމަވެސް އެންމެ ފުރަތަމަ ހޯދާނީ ޖީބުގައި އޮންނަ ސްމާޓްފޯނެވެ. ނުވަތަ ކަލްކިއުލޭޓަރެވެ. ކީއްވެގެން ހެއްޔެވެ؟ ފަސޭހަކަމާއި އަވަސް ކަމާއެކު ޖަވާބު ލިބޭނެތީއެވެ. މިއަދު އަޅުގަނޑުމެން ޓެކްނޮލޮޖީއަށް ބަރޯސާވެފައިވާ މިންވަރަކީ އަޅުގަނޑުމެންގެ ސިކުނޑީގެ ބޭނުންކޮށްގެން ކިތަންމެ އާދައިގެ ހިސާބެއް ހެދުމަށް ވެސް ފަސްޖެހެވުމެވެ. އަމިއްލަ ނަފްސުގެ އިތުބާރާއި ޔަޤީންކަން ނެތުމެވެ. ހިސާބު ހެދުމުން ފެށިގެންގޮސް ރަހުމަތްތެރިންނާއި މުއާމަލާތުކުރުމާއި ބިލްތައް ދެއްކުމާއި ޕިއްޒާއަކަށް އޯޑަރު ކުރުމުގައްޔާއި ޢާއްމުކޮށް ހުރިހާ ކަމެއްގައި އަޅުގަނޑުމެންގެ މުޖުތަމަޢު މިވަނީ ޓެކްނޮލޮޖީއަށް ބަރޯސާވެފައެވެ. ނުވިތާކަށް ރޭގަނޑު ނިދަން ދިއުމަށް ހަނދާން ކޮށްދެނީ ސްމާޓްފޯނެވެ. އަދި ގިނަ ވަގުތު އިށީންދެ އިނުމުން، ތެދުވެ ހަރަކާތްތެރިވެ އުޅުމަށް ބުނެދެނީ ވެސް އަތުކުރީގައި އޮންނަ ސްމާޓްގަޑިއެވެ.
ޓެކްނޮލޮޖީއަކީ އެއްވެސް ޝައްކެއްނެތްގޮތުގައި އެތައް ފަސޭހަތަކެއް އަޅުގަނޑުމެންގެ ދިރިއުޅުމަށް ގެނެސްދިން އަދި ގެނެސްދެމުންދާ ވަޞީލަތެކެވެ. ބަލި މީހުންނަށް ފަރުވާ ދިނުމުގައި ޑަކުޓަރުންނަށް އެހީވެދެނީ ޓެކްނޮލޮޖީއެވެ. އުނގަންނައި ދިނުމުގައި ބޭނުންކުރާ އެހީތައް ތައްޔާރުކޮށް ދަރިވަރުންނަށް ފޯރުކޮށްދިނުމުގައި މުދައްރިސުންނަށް އެހީވެދެނީ ޓެކްނޮލޮޖީއެވެ. ކަސްޓަމަރުން ހިތްހަމަޖެހޭ ޚިދުމަތްތައް ފޯރުކޮށްދިނުމުގައި ވިޔަފާރިތަކަށް އެހީވެދެނީ ޓެކްނޮލޮޖީއެވެ. ފިލާވަޅުތައް ނިންމުމުގައި ދަރިވަރުންނަށް އެހީވެދެނީ ޓެކްނޮލޮޖީއެވެ. ދަނޑުތަކަށް ފެން ދިނުމުގައި ދަނޑުވެރީންނަށް އެހީވެދެނީ ޓެކްނޮލޮޖީއެވެ. އެހެން ޤައުމެއްގައި ނުވަތަ އެހެން ރަށެއްގައި ތަޢުލީމު ޙާޞިލް ކުރަމުންދާ ދަރިފުޅާ މައިންބަފައިން ގުޅުވައިދެނީ ޓެކްނޮލޮޖީއެވެ. ކާރާއި މަތިންދާބޯޓާއި ގޫގުލްއާއި ސްމާޓްފޯނާއި އެކި ސޮފްޓްވެއަރތަކަކީ އަޅުގަނޑުމެންގެ ދުވަހީ މަސައްކަތްތައް ހަލުވިކޮށްދީ ޖެހޭ މައްސަލަތައް މަދުކޮށްދޭ ބައިވެރީންނެވެ. އެހެންވީއިރު މި ތަކެތީގެ ބޭނުން ނުކުރާންވީ ސަބަބެއް އެބަ އޮތް ހެއްޔެވެ؟ މި ސުމޭކު (ޑިޖިޓަލް) ޒަމާނުގައި އަޅުގަނޑުމެންގެ ސިކުނޑިއަށާއި ހަށްޓަށް ބަރު ކުރަންވީ ކީއްކުރަން ހެއްޔެވެ؟
ޓެކްނޮލޮޖީއާއެކު އަޅުގަނޑުމެންގެ ދިރިއުޅުން ލުއި ފަސޭހަކުރުމުގައި އަވަދިނެތި އުޅެމުންދާ އިރު، ޓެކްނޮލޮޖީއަށް ބަރޯސަވެވޭ މިންވަރަކުން އަޅުގަނޑުމެންގެ ސިކުނޑިތަކަށް އެއިން ނޭދެވޭ އަސަރުތަކެއް ކުރާކަމީ ގިނަ ބަޔަކު އެ ކަމަކާމެދު ވިސްނާ ކަންކަމެއް ނޫންކަން ކަށަވަރެވެ. ކޮންމެ ކަމަކަށް މޯބައިލް އެޕެއް ބޭނުންކޮށް އެކި މެޝިންތަކަށް މަސައްކަތްތައް ހަވާލުކުރާ އިރު ކިތަންމެ ކުޑަކަމެއް ވިޔަސް އަމިއްލަ ސިކުނޑިން ވިސްނައިގެން ނުކުރުމަކީ ނޭނގިނަމަވެސް ސިކުނޑިއަށް ދެވޭ ވަރަށް ބޮޑު ގެއްލުމެކެވެ. ސިކުނޑިއަކީ އޭގެ ބޭނުން ނުކުރާ ނަމަ ބާރު ދެރަވެ ވިސްނުމާއި ބުއްދިއަށް އަސަރު ކުރުވާ ކަމެކެވެ. ޚާއްޞަކޮށް ހެދިބޮޑުވުމަށް ހުރަސްއަޅާ ނަފުސާނީގޮތުން މީހާ ބަލިކަށި ކުރުވާ ކަމެކެވެ. އުނގެނި ދަސްކުރުމަށާއި ސިކުނޑީގައި ދިގު މުއްދަތަކަށް ޢިލްމާއި އެހެނިހެން ކަންކަން ރައްކާކުރުމަށާއި އެ ކަންކަން ހަނދާން ކުރުމަށް ވެސް އެޅޭ ހުރަހެކެވެ. މިއީ ޚާއްޞަކޮށް ކިޔަވާ ދަރިވަރުންނާއި ޒުވާނުން ވިސްނާލަންޖެހޭ ކަމެކެވެ.
ބުއްދިއާއި ވިސްނާ ފިކުރުކުރުމަކީ އިންސާނާއަށް މާތްﷲ ދެއްވާފައިވާ އަގުބޮޑު އެއް ނިޢުމަތެވެ. އެހެން މަޚްލޫޤުންނާއި އިންސާނާ ތަފާތުކުރުވާ އަދި މަތިވެރިކޮށްދޭ އަސާސް ވެސް މެއެވެ. ދުނިޔެ އާރާސްތުކޮށް މުޖުތަމަޢު ބިނާ ކުރުމުގައި އެންމެ އިސްރޯލު އަދާކުރަނީ ވެސް ވިސްނުންތެރި އުފެއްދުންތެރި ސިކުނޑިތަކެވެ. ހުނަރުވެރި ފަންނުވެރި ބުއްދިތަކެވެ. އެއްވެސް ޝައްކެއްނެތް ގޮތުގައި މި ކަމުގެ ހުންގާނުގައި އަބަދުވެސް ތިބޭނީ އެ ކަންކަމަށް ބޭނުންވާ ޢިލްމުވެރީންނެވެ. ކަމާގުޅޭ ތަޢުލީމް ޙާޞިލްކޮށް ޢަމަލީ މައިދާނުގައި ހަރަކާތްތެރިވާ އާރުކާޓީންނެވެ. އެހެންކަމުން ކިޔަވާ ދަރިވަރުން ތަޢުލީމު ޙާޞިލްކުރުމުގައި ޓެކްނޮލޮޖީއަށް ބަރޯސާވުމުގައި ސަމާލުވާން އެބަ ޖެހެއެވެ. ކިޔަވާ އެއްޗެއް ސިކުނޑީގައި ހަރުލައްވައި ޢަމަލީ މައިދާނުގައި ލިބިގަތް ޢިލްމު ޙާލަތްތަކާ ގުޅޭގޮތުން ބޭނުން ކުރުމަށް ޓަކައި ސިކުނޑި މަރުވިޔަނުދީ އަބަދުވެސް ދިރިބަހައްޓަން ޖެހެއެވެ. ފަސޭހައިން ކުރެވޭ ކަންކަން ސިކުނޑީގެ ބޭނުންކޮށްގެން ކުރަންޖެހެއެވެ. ކޮންމެ ކަމެއްގައި ޓެކްނޮލޮޖީއަށް ބަރޯސާވާންޖެހޭ މިންވަރާއި މިންގަނޑާއި ހުދޫދު ދެނެގަންނަން ޖެހެއެވެ.
އަޅުގަނޑުމެން ޓެކްނޮލޮޖީއަށް ބަރޯސާވާކަމީ ޝައްކެއްއޮތް ކަމެއް ނޫނެވެ. މި ބަރޯސާވުމަކީ ފައިދާއަކަށްވުރެ ލިބޭ ގެއްލުމެއްކަމުގައި ނިންމާނީ ޓެކްނޮލޮޖީގެ ބޭނުން ކުރާ މީހާއެވެ. އަތުގައި ފޯނު ނެތް ޙާލަތެއްގައި ނުވަތަ އޮންލައިން ނުވެވޭ ޙާލަތެއްގައި ނުވަތަ މީހަކާ މޫނާ މޫނު ދިމާވުމުން ނުތަނަވަސްވާ ނަމަ ނުވަތަ އެންމެ އާދައިގެ ހިސާބު ހިތުން ހަދާނުލެވޭ ނަމަ ތިމާ ސަމާލުވާންޖެހޭނެއެވެ.
ކޮމްޕިއުޓަރާއި އެޕްލިކޭޝަންތަކަކީ ތިމާގެ ވިސްނުމާ ފިކުރަށްވެފައި މެޝިންތަކާއި ގެޖެޓްތަކަކީ ތިމާގެ އަތާއި ފަޔަށް ވާ ހިސާބަށް ހިނގައްޖެނަމަ އެއީ އެ ތަކެއްޗާ ކޮންމެވެސް ވަރަކަށް ދުރަށް ޖެހިލަންވެއްޖެކަމުގެ ސިގުނަލެކެވެ. ތިމާގެ ކުރީން ހުރި ހުނަރެއް ޓެކްނޮލޮޖީއާ ނުލައި ނުކުރެވޭ ހިސާބަށް ގޮސްފިނަމަ އެއީ ތިމާގެ ސިކުނޑިއަށް ފުރުޞަތުތަކެއް ދޭން ޖެހޭ ކަމުގެ އިންޒާރެކެވެ. އެސައިންމަންޓްގެ ސުންގަޑި، ތާވަލު ކުރެވިފައިވާ ކިލާސް، ކިޔަވައިދެއްވާ މުދައްރިސް ނުވަތަ ތިމާ ސަމާލުކަންދޭންޖެހޭ ކަންކަމުގެ މަތީން ތިމާ ހަނދާން ނެތިކޮށްލާ ސަބަބެއްކަމުގައި ގޫގުލް ކަލަންޑަރުގައި ނުވަތަ ފޯނުގައި އެ ކަންކަން ރިމައިންޑަރ އަށް ނުލެވިއޮތް އޮތުން ކަމުގައި ވާހިސާބުން ތިމާގެ ސިކުނޑީގައިވެސް ކަންކަން ރައްކައުކުރަން ވެއްޖެކަމުގައި ދަންނާށެވެ!
އާދޭހެވެ! މިއީ ސުމޭކު ޒަމާނެވެ. އަޅުގަނޑުމެންގެ ދިރިއުޅުމަށް ނުހަނު ބޮޑެތި ލުއި ފަސޭހަތަކެއް ޓެކްނޮލޮޖީން ގެނެސްދީފިއެވެ. މިކަމަކާ ދެބަހެއް ނުވެވޭނެއެވެ. ވީއިރު 14 އެއްކުރަން 2 އެއީ 16 ކަން ބުނެދިނުމަށް ވިސްނުމުގެ ބަދަލުގައި ކަލްކިއުލޭޓަރ ބޭނުންކުރުމުގައި އޮތީ ކޮން މައްސަލައެއް ހެއްޔެވެ؟ އެކަމާ ބޯގާނަންވީ ކީއްކުރަން ހެއްޔެވެ؟ މިއީ އެންމެ ރަނގަޅު ވިސްނުމެއް ނޫނެވެ. ޓެކްނޮލޮޖީއަކީ މައްސަލައެއް ވެސް ނޫނެވެ. އަޅުގަނޑުމެންގެ ދިރިއުޅުމުން ބޭރުކުރަންޖެހޭ އެއްޗެއް ވެސް ނޫނެވެ. ބޭރުކުރާކަށް ނުވެސް ޖެހެއެވެ.
މައްސަލައަކަށްވަނީ އެ ބޭނުން ކުރެވޭ ގޮތެވެ. އެއަށް ބަރޯސާވުމުގައި އަޅުގަނޑުމެންގެ ސިކުނޑީގެ ބާރު ނެތިކޮށްލާ ވަރަށް ބަރޯސާވެވުމެވެ. ކޮންމެ ކަމެއްގައި ވެސް އެ އޮންނަ މިންގަނޑުތަކާއި ހުދޫދުގެ ތެރޭގައި އެ ކަމެއްގެ ބޭނުން ކުރަން ޖެހެއެވެ. އެހެން ނޫންނަމަ ކިތަންމެ ފަސޭހަ އަދި ފައިދާ ލިއްބައިދޭ ކަމެއް ކަމުގައިވީ ނަމަވެސް އެކަމަކުން ލިބޭ ގެއްލުން ބޮޑުވެދާނެއެވެ.
އަޅުގަނޑުމެންގެ ބުއްދި އާއި ވިސްނުމަކީ އަގުބޮޑު ނިޢުމަތެކެވެ. ހިސާބު ހެދުމަށް ނޫން ނަމަވެސް އަޅުގަނޑުމެންނަކީ ނަފުސާނީގޮތުން ދުޅަހެޔޮ، ވިސްނުންތެރި، އުފެއްދުންތެރި ބަޔަކަށް ވުމަށްޓަކައި ވެސް ސިކުނޑި މަރުވިޔަ ނުދީ ދިރި ބަހައްޓަންޖެހެއެވެ. މިކަން ކުރެވޭނީ އަޅުގަނޑުމެންގެ ސިކުނޑިތަކަކީ ޓެކްނޮލޮޖީއަށް މާބޮޑަށް ބަރޯސާ ވާ އެއްޗަކަށް ހެދުމުގެ ބަދަލުގައި، އަޅުގަނޑުމެންގެ ވިސްނުމާ އެއްގޮތަށް ބޭނުންކުރެވޭ އެއްޗެއްކަމުގައި ޓެކްނޮލޮޖީ ހަދައިގެންނެވެ.
ނޯޓް: މިއީ ދަރިވަރު ނޫހުގައި 2021 އޮކްޓޫބަރު 13 ގައި އިބްރާހީމް އާދަމް ޝާޢިއު ކޮށްފައިވާ ލިޔުމެކެވެ.
