ރ. މާކުރަތު ކައުންސިލާއި ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީ އޮފް ޝަރީޢާ އެންޑް ލޯ ގުޅިގެން، އެ ރަށުގައި ދީނީ ހޭލުންތެރިކަން އިތުރުކުރުމުގެ ޚާއްޞަ ޕްރޮގްރާމްތަކެއް ކާމިޔާބުކަމާއެކު ބާއްވައިފިއެވެ. މި ހިނގާ އޮގަސްޓް މަހުގެ 27 އިން 29 އަށް ތިން ދުވަހުގެ މުއްދަތަށް ކުރިއަށް ގެންދިޔަ މި ސިލްސިލާ ޕްރޮގްރާމްތަކުގައި މަޢުލޫމާތު ދެއްވައި، ސެޝަންތައް ކުރިއަށް ގެންގޮސްދެއްވީ ފެކަލްޓީ އޮފް ޝަރީޢާ އެންޑް ލޯގެ ޑީން، ޑރ. ޢަބްދުއްސައްތާރު ޢަބްދުއްރަޙްމާނެވެ.

މި ޕްރޮގްރާމްތައް އަމާޒުކޮށްފައިވަނީ މުޖުތަމަޢުގެ އެކި ފަންތިތަކުގެ ބޭފުޅުންނަށެވެ. އެގޮތުން އިސްލާމީ ހަމަތަކުގެ މަތިން ދަރިން ތަރުބިއްޔަތު ކުރުމަށާއި، މި ޒަމާނުގައި ދީނީ އަދި އިޖުތިމާޢީ ގޮތުން ބެލެނިވެރިން ސަމާލުކަން ދޭންޖެހޭ މުހިންމު ކަންކަމާ ގުޅޭގޮތުން ބެލެނިވެރިންނަށް މަޢުލޫމާތު ދެވުނެވެ. މީގެ އިތުރުން ސްކޫލު ދަރިވަރުންގެ އިސްލާމީ ރިވެތި އަޚްލާޤާއި އަދަބުތައް ދަސްކޮށްދީ، ދީނީ މަޢުލޫމާތު މުއްސަނދިކުރުމަށް ޚާއްޞަ ސެޝަނެއް ކުރިއަށް ގެންދެވުނުއިރު، ރަށުގެ ޢާންމު ރައްޔިތުންނަށް އަމާޒުކޮށްގެން ދީނީ މުހިންމު މަޢުޟޫޢުތަކަށް މަޢުލޫމާތު ދިނުމާއި، މިސްކިތުގައި ޢާންމުކޮށް ހުޅުވާލައިގެން ދީނީ ދަރުސްތައްވެސް ވަނީ ދެއްވާފައެވެ.

މާކުރަތުގެ ރައްޔިތުންނާއި، ސްކޫލު ދަރިވަރުންގެ އިތުރުން ބެލެނިވެރިންގެ ފަރާތުން ބޮޑު ތަރުޙީބެއް ލިބިގެންދިޔަ މި ޕްރޮގްރާމްތަކުގެ ހުރިހާ ސެޝަނެއްގައިވެސް، ބައިވެރިންގެ ހިތްތަކުގައި އުފެދިފައިވާ އެކިއެކި ދީނީ ސުވާލުތަކަށް ޖަވާބު ދެއްވައި، މަޝްވަރާ ކުރުމުގެ ފުރުޞަތު ފުޅާ ދާއިރާއެއްގައި ވަނީ ފަހިކޮށްދެއްވާފައެވެ. މިފަދަ ޕްރޮގްރާމްތަކަކީ ރަށުގެ އިޖުތިމާޢީ އަދި ދީނީ ފޭރާން ވަރުގަދަކޮށް، ރައްޔިތުންގެ މެދުގައި ދީނީ ހޭލުންތެރިކަން އިތުރުކުރުމަށްޓަކައި ނުހަނު މުހިންމު ޕްރޮގްރާމްތަކެއް ކަމަށާއި، ކުރިއަށް އޮތް ތަނުގައިވެސް މިފަދަ ބޭނުންތެރި އިތުރު ޕްރޮގްރާމްތައް ރަށުގައި ހިންގުމަށް މަސައްކަތް ކުރައްވާނެ ކަމަށް ކައުންސިލުން މަޢުލޫމާތު ދެއްވައެވެ.